Mukammal veb-studiya tanlash: Biznes egalari yo'l qo'yadigan 5 asosiy xato

To'g'ri hamkorni tanlash loyihaning muvaffaqiyatini 50% ga hal qilsa, noto'g'ri tanlov vaqt, pul va asablarni yo'qotishga olib keladi. Afsuski, ko'plab tadbirkorlar O'zbekistonda veb studiya tanlashda bir xil xatolarga yo'l qo'yishadi. 100 dan ortiq mijozlar bilan ishlash tajribamizdan kelib chiqib, eng keng tarqalgan 5 ta xatoni tahlil qilamiz.  

1-xato: Faqat narxga qarab tanlash
"Kim arzonroq qilib beradi?" — bu eng xavfli savol. Bozorda $300-$400 ga sayt taklif qiladiganlar ko'p. Lekin siz aslida nima sotib olayotganingizni tushunishingiz kerak. Odatda, bu bir xil shablon asosidagi dizayn, sekin ishlaydigan va kelajakda rivojlantirib bo'lmaydigan yechim bo'ladi. Natijada, bir necha oydan so'ng siz bu sayt ishlamayotganini tushunasiz va qayta qilish uchun baribir professional studiyaga murojaat qilasiz.

2-xato: Portfolioni e'tiborsiz qoldirish
Studiya sizga o'zining "300+ loyihasi" borligini aytishi mumkin, ammo sizga bu loyihalarni ko'rsata oladimi? Portfolio — bu studiyaning tajribasi va uslubining (stil) yagona isboti. Portfolioni ko'zdan kechirayotganda, shunchaki rasmlarning chiroyli ekanligiga emas, balki ularning xilma-xilligiga, ishlarning zamonaviyligiga va sizning sohangizga o'xshash keyslar bor-yo'qligiga e'tibor bering. Sifat va estetika har bir ishda ko'rinib turishi kerak.  

3-xato: Strategiyani muhokama qilmaslik
Agar studiya sizdan "Qanaqa sayt kerak?" deb so'rasa-yu, lekin "Nima maqsadda sayt kerak?", "Mijozlaringiz kim?", "Raqobatchilaringizdan qanday ajralib turmoqchisiz?" kabi savollarni bermasa, ehtiyot bo'ling. Bu shunchaki "ijrochi", lekin strategik hamkor emas. Professional studiya sizning biznes maqsadingizni tushunishi va natijaga yo'naltirilgan strategiya taklif qilishi shart.  

4-xato: Uzoq muddatli hamkorlikni o'ylamaslik
Saytni ishlab chiqish — bu jarayonning boshi xolos. Saytni texnik qo'llab-quvvatlash, yangilab turish, kelajakda yangi funksiyalar qo'shish kerak bo'ladi. Agar studiya faqat loyihani topshirish bilan cheklansa, siz kelajakda muammolar bilan yolg'iz qolasiz.

5-xato: Faqat bitta odamga (frilanserga) ishonish
Bitta frilanser dizaynni ham, kodni ham, marketingni ham mukammal bilishi noyob holat. Professional sayt — bu jamoaviy ish. Art-direktor, UX/UI dizayner, biznes-analitik, backend va frontend dasturchilar birgalikda ishlaydi. Studiya tanlash orqali siz bitta odamning emas, balki butun bir jamoaning tajribasini sotib olasiz.